【開箱】ZANCO tiny T1 手機,比你想像中的還要小

ZANCO tiny T1 手機 這款手機主打微型!話自己話可能係世界上最最細嘅電話,聽落都覺得好想試下。當年石先生用過叫做全世界最薄嘅電話係 Sony Ericsson,當時嘅手機追求細、追求薄。當今日各大智能手機都追求大得來又好揸手嘅時候,估唔到會有廠商推出極細嘅手機,真係估你唔到。

細到底有幾細呢?點都要放得落張 nanoSIM Card 卦!放得落張 nanoSIM Card 又唔可能太細隻啦!因為你都要放其他線路版,仲要放得落喇叭、鍵盤等,點都有個譜。

點知… 開箱一睇真係細到有啲過份…

ZANCO tiny T1 手機個手機盒平平無奇,而石先生呢部因為係借用版,所以個盒咩都貼住哂,但唔好理呢個唔係重點,重點係下面部機。

當你以為個盒好細,已經係部機嘅全尺寸嘅時候,打開發覺部手機仲細,真係細到痴線,連個盒嘅二分一都無,大概係盒嘅六分一尺寸,真係好跨張。

跨張得來最過份係你竟然仲見到部手機有個屏幕,而屏幕下面仲有五粒制,五粒制下面仲有 12 粒傳統數字撥號鍵盤設計,真係手指大啲都大隻過部手機。

用口講真係好難講部手機有幾細,所以直接拿個 micrUSB 轉 lightning 插頭來比較,只係大個插頭少少,只有46.7mm x 21m x 12mm。

規格上佢係用 MTK6261D,行 2G GSM850, GSM900, DCS1800 及 PCS1900,有 32MB RAM + 32MB ROM,得一個 1 吋唔夠,得 0.49 吋嘅 64 x 32 解像度 OLED 屏幕及 200mAh 電池。

一部咁細嘅機有咩用呢?佢嘅尺寸直頭細到可以掛係鑰匙包而毫不突兀,或者行山出外、跑步時掛係褲頭或者袋內都唔會硬親。當然,你唔好以為呢部電話可以幫你上 FB,影相或者做啲咩超勁野。

佢最大嘅賣點就係細細部有 3 日待機,180 分鐘通話時間。就算行錯路想打電話問朋友都唔駛驚電話無電,絕對係一個遠行者必備嘅電話。依家咁多人鐘意揹住個背包去旅行,整番部傍身保平安就啱啦!


此文章首發於 TechRitual;標題:【開箱】ZANCO tiny T1 手機,比你想像中的還要小

 

你的讚好是我們的原動力!

關於作者
留言